Ads by Google Ads by Google

To’atele na maua siaki Ovataimi ae le agava’a

E i ai tagata faigaluega a le malo sa le tatau ona agavaa latou i ovataimi, a’o lea na maua a latou siaki tetele i ovataimi a le malo, e pei ona faamalamalama e le Faatonusili o le Matagaluega o Tagata Faigaluega a le malo ia Sonny L. Thompson, i luma o le Fono a le Kapeneta i le aso Lua na te’a nei.

 

Na aofia le mataupu i ovataimi a tagata faigaluega a le malo i le folasaga a Thompson, a’o ia taumafai e faamanino nisi o matafaioi tauave a lana matagaluega, e aofia ai le malosi latou te faa faigaluegaina ai tagata faigaluega a le malo, ma teu malu faamaumauga e fitoitonu i tagata faigaluega a le malo.

 

Soo se tagata faigaluega a le malo e itiiti ifo i lalo o le  $380 lona totogi i le vaiaso o ia lena e agava’a i ovataimi, a’o i latou uma e ova atu ma le aofaiga lea a latou totogi e maua i le vaiaso, e le agava’a i latou i ovataimi.

 

Afai fo’i o se tagata faigaluega na te umia se tulaga maualuga i le Matagaluega, pe aafia fo’i o ia i le faia o faaiuga i totonu o le Matagaluega e pei o le tuuina atu o faatonuga i ni tagata faigaluega, e i ai lona malosi e faa faigaluega pe faamalolo ai foi se tagata faigaluega, poo lona tuuina atu o ni fautuaga mo le faa faigaluegaina o ni tagata, e le agavaa fo’i lena tagata i ovataimi.

 

O le mataupu i ovataimi a tagata faigaluega a le malo e pei ona saunoa Thompson, e le o se mataupu e fou, ae foliga mai e le o tausisi lava matagaluega a le malo i le tulafono e faafoe ai.

 

“O le tulaga muamua lava e tatau ona manino, afai e leai se tupe a lau matagaluega e totogi ai ni ovataimi, e le tatau la ona faia ni ovataimi a tagata faigaluega,” o le saunoaga lea a Thompson, faatasi ai ma lona toe faamanatu atu i le Kapeneta le poloaiga a le kovana i le masina o Ianuari, 2013, e taofi ai le toe faia o ni ovataimi a le malo.

 

O le $916,000 lea na faaalu e totogi ai ovataimi a nisi o tagata faigaluega a le malo i ni nai masina e le’i mamao atu, o le tele o ia ovataimi sa le tatau ona totogiina.

 

Mo se faataitaiga e pei ona saunoa Thompson, o le toatele o tagata faigaluega a le Matagaluega o le Puipuiga o le Saogalemu Lautele sa maua siaki mo ovataimi e latalata i le ta’i $20,000, sa le tatau ona maua e i latou ia siaki nei, ona o nisi o i latou nei o lo o umia tulaga maualuluga i totonu o le Matagaluega, ma o lo o aofia i latou i le faia o faaiuga i totonu o le Matagaluega.

 

 “Ina ua matou toe suesue i le tulafono e faatatau i ovataimi, ua matou maua ai, o le toatele o tagata mai le Ofisa o Leoleo sa maua siaki tetele e o o atu i le ta’i $20,000 mo ovataimmi, sa le tatau ona agavaa i latou nei i siaki tetele, ona o nisi o i latou nei o lo o aofia i le faiga o faaiuga a le matagaluega, ma e le o tusa ai lea tulaga ma le tulafono.” o le saunoaga lea a Thompson.

 

O le leai o se naunau e tausisi i tulafono o lo o lima taitaiina ai galuega a le malo, o se tasi lea o tulaga na taua e Thompson e le tatau ona tupu, ina ne’i avea le faatamala o le malo e tausisi ma usita’i i a tatou lava tulafono ma itu e tulioso mai ai le Feterale ma togi i fafo a tatou tulafono, ae tuu mai a latou tulafono e lima taitaiina ai galuega a le malo.

 

I le saunoaga a le afioga i le alii kovana ia Lolo Moliga e faatatau i lenei mataupu sa ia taua ai e faapea, afai e i ai se manaoga o se matagaluega e faia ni ovataimi, ua ia fautuaina le tatau lea ona faa faigaluega nisi tagata faigaluega fou ina ia faasoa atu ai tupe o lo o totogi i ovataimi ma maua ai foi e isi tagatanuu le avanoa e galulue ai, nai lo le tuuina atu o tupe e totogi ai ovataimi mo se vaega toaititi.

 

“A manaomia e lau matagaluega ovataimi, faa faigaluega nisi tagata faigaluega fou, toatele tupulaga talavou o lo o tau saili ni galuega, ae aua le manatu e ave le penefiti i le tagata e toatasi, e le o le manulauti lena o le faigamalo ma le faamoemoe, ae tatau ona faasafua le manuia i tagatanuu uma o le atunuu,” o le saunoaga faaiu lea a Lolo e faatatau i lenei mataupu.