Ads by Google Ads by Google

To’atele le au kuka na fa’amanuiaina i oga umu fou

E silia i le to’a 30 tagata kuka na auai i le Fa’aaliga a le Aufai Faatoaga na faamanuiaina i oga umu fou, e pei ona faamaonia mai e le Faatonusili o le Matagaluega o Faatoaga, le afioga Lealao M. Purcell.

 

O i latou sa faamanuiaina i lenei tauvaga, sa mafai ona lesitala o latou suafa ma latou saunia ai kuka eseese mo alii ma tamaitai faamasino, aemaise ai le mamalu o le atunuu na mafai ona lolofi atu e fia molimauina lenei faamoemoe taua.

 

Na taua e Lealao e faapea, o le agaga autu o le polokalame, ia mafai ona maua e le au kuka o le atunuu ni fesoasoani e faaleleia atili ai a latou galuega faatino, e pei o oga umu e kuka ai a latou meaai ma faatau atu ina ia maua ai se tupe mo le aiga.

 

“O le toatele o i latou sa lesitalaina i lenei tauvaga ua maua tusi pasi i aoga kuka, ma ua i ai lo latou tomai i le kukaina o taumafa eseese, o le mafuaaga foi lena ua manatu ai le malo, e tatau foi ona i ai se fesoasoani mo le au kuka, i le faaleleia o a latou tama’i pisinisi o lo o tausi ai o latou aiga,” o le saunoaga lea a Lealao.

 

Na felanulanua’i kuka eseese na mafai ona saunia e i latou sa lesitalaina mo le tauvaga, ma maitauina ai le toatele o le atunuu na lolofi atu i le tofoina o nei kuka manogi.

 

O nisi sa latou kukaina le supo i soo se sikaili, ae o isi sa latou faia ni kuka e fou foi i le tofo a alii ma tamaitai faamasino.

 

Na taua e le tina kuka o Maria Avalupe o Iliili e faapea, o meaai sa ia kukaina o le tauvaga sa aoaoina ai o ia i le aoga kuka sa auai atu ai i le lua tausaga talu ai.

 

“O la’u kuka o le faaaoga lea o fualaau e fai ai le supo i se auala e ese fo’i lona tofo i tagata, ou te faaaogaina i ai fagu fai meaai manogi eseese, ma o se kuka lea ou te manatu o le a maua ai so’u tulaga i lenei tausaga,” o le saunoaga lea a Maria.

 

O tagata kuka uma lava sa auai i le tauvaga, sa tofu uma ma faailoga na saunia e le Matagaluega mo i latou.

 

O le alii kuka ia Vince Filemoni o Aua, e le gata sa faalauiloa nisi o ana kuka e pei o salati ma le supo, ae sa ia kukaina foi nisi o taumafa Samoa e pei o umu talo, taamu ma palusami.

 

O nisi o vaega na fuafua i ai togi a le komiti, e le gata o le ituaiga kuka sa saunia, ae o le tofo lelei ma le atoatoa uma o mea e faaaoga i ai.

 

Na taua e se sui o le Komiti sa tofoina taumafa ia Lupe Filoialii e faapea, toeitiiti o tagata kuka uma ua atoatoa uma i ai le tomai i le kukaina o taumafa.

 

“O le tele o taumafa sa kukaina e i latou nei e faaaoga i ai metotia sa latou aoaoina mai aoga kuka, sei vagana ai nisi o le latou lava sogasoga ma le mataala i ituaiga kuka e manogi i le tofo, o a latou taumafa sa mafai ona faalauiloa i lenei faamoemoe.”