E to’atele faiaoga a le malo e lei pasi i le suega e taua o le ‘Praxis test’ sa latou su’e ai, e pei ona fa’amaonia mai e le Fa’atonusili o Aoga a le malo ia Vaitinasa Dr. Salu Hunkin Finau i se feiloaiga ma Tusitala i le vaiaso nei.

Na taua e Vaitinasa e fa’apea, ua fautuaina i latou e le’i pasia, ina ia toe su’e vaega o le suega e le’i pasi. Na fa’amanino atili e Vaitinasa e fa’apea, e tolu vaega o le suega e tatau ona su’e ma pasi ai le faiaoga, ina ia mafai ai ona aloaia le avea o ia ma faiaoga, peita’i o le to’atele o i latou sa su’e i le suega, e na o le tasi le vaega o le suega sa pasi, pe na o le lua.

“O lea la ua toe fa’atulaga le suega ina ia toe su’e ai i latou uma e le’i pasi, ina ia mafai ai ona fa’atino tiute tauave a le Matagaluega o Aoga, e ala i le fa’a pasia o faiaoga ma aloaia le avea o i latou o faiaoga a le malo,” o le saunoaga lea a le tama’ita’i fa’atonusili.

Na fesiligia le tama’ita’i fa’atonusili po o aofia ai ma faiaoga e to’a 11 mai Samoa i le su’eina o le suega lea, ae na tali Vaitinasa ioe, e tatau fo’i ona su’e ai ma latou ina ia ausia agava’a moomia mo soo se tasi e faiaoga mo le malo.

I le fa’aiuga o le suega ua mae’a ona faia, e foliga mai ai o le to’atele o faiaoga o loo i ai fa’ailoga tikeri, e mana’omia le fesoasoani i le mataupu o le Gagana Peretania, ae o isi faiaoga e manaomia le fesoasoani i isi mataupu e pei o le Faitau Tusi, e pei ona saunoa le tama’ita’i fa’atonusili.

“O le taua o le suega lenei, ua mafai ai e le matagaluega ona iloa tonu vaega o loo mana’omia ai le fesoasoani mo faiaoga, o le mafua’aga fo’i lena ua matou ofo atu ai galuega fesoasoani mo faiaoga nei,” o le saunoaga lea a Vaitinasa.

Ae mo vaega o le suega e tatau ona su’e ai faiaoga, na saunoa ai Vaitinasa e fa’apea, o le a taumafai lava le Matagaluega o Aoga e fa’aavanoa vaega o le suega i luga o le initaneti, ina ia fa’a faigofie ai i faiaoga ona saili a latou taimi avanoa e su’e ai a latou pepa suega.

“O le agaga autu o le matagaluega, e tatau ona maua uma fa’ailoga BA o faiaoga ao lei oo atu i le tausaga e 2016,” o le isi lea saunoaga a le tama’ita’i fa’atonusili.

O se tasi o moemitiga o le tama’ita’i fa’atonusili e pei ona ia fa’asoa i le feiloaiga ma Tusitala, o le taumafai lea ina ia fa’a Tumaoti le Ofisa o Aoga, ina ia fa’a faigofie ai ona fai gaioiga e tali atu ai i ni manaoga e tutupu fa’afuase’i mai, ma taofia ai le tau uia o le auala umi i lalo o tulafono ma ta’iala a le malo.

Mo se fa’ata’ita’iga e pei ona saunoa Vaitinasa o le fa’atauina o mea e fa’aaoga mo aoga aemaise ai fo’i o le fa’a faigaluegaina o ni faiaoga fou, e le mafai ona vave taunu’u ia manaoga i le taimi nei, se’i vagana ua uia uma tulafono e pei o le talosaga i le Matagaluega o Tagata Faigaluega mo ni avanoa o faiaoga fou o loo mana’omia.

Saunoa atili Vaitinasa e fa’apea, afai e taunu’u lenei moemitiga o le fa’a Tumaoti o le Ofisa o Aoga, e pei ona i ai le Falema’i o le LBJ, ASPA ma le Kolisi, lea fo’i ua ia vaaia le ono lagolagoina e le alii kovana, ona vave ai loa lea ona tali manaoga fa’afuase’i e tutupu mai i le ofisa o aoga.

I le avea ai o le matagaluega o aoga, o se tasi o matagaluega e pito sili ona to’atele ana tagata faigaluega, aemaise ai o ana matafaioi tauave i le malo, na saunoa ai le tama’ita’i fa’atonusili e fa’apea, o se fuafuaga talafeagai ua ia manatu i ai ina ia fa’afaigofie ai ona fa’atino manaoga a le matagaluega.