A’amanatu 50 tausaga AOG Calvary i Lepuapua

Ua pa’u tonu i lenei tausaga le atoaga o le 50 tausaga o le Ekalesia Fa’apotopotoga a le Atua i Lepuapua i le taeao manino o le Eseta, “le taeao ua sili ona fa’amemeo ai tagata Kerisiano i le lalolagi, aua o le taeao na mautinoa ai ua togiola le tagata agasala i le taulaga tutasi na saunia e Iesu Keriso.”

 

O le pese fou fo’i lea na usuina i totonu o lea malumalu i lona sauniga e fa’amanatu ai le 50 tausaga talu ona fa’atuina le Ekalesia i Lepuapua, peita’i, e ui ina sa na’o se motumotu sa tau feula ina ia ola, ae ua iloga ua mumu atoatoa i lenei vaitaimi, i le to’atele ma le tupu o le Ekalesia ua i ai nei.

 

O le vaega muamua lava o le sauniga, sa laugaina ai le Upu a le Atua e lana auauna Rev. Viliamu Pa’aga. O le autu o lana fe’au na momoli mai, “Ia vi’ia le Atua ma le fiafia!” O se fe’au taua, aua sa matua fa’amamafa e ia, “Lou fiafia e vi’ia le Atua ma fa’afo’i ia te ia lau fa’afetai ma le olioli.”

 

I lana folasaga, sa ia fa’ailoa ai, “Pe ana le vi’ia e i tatou le Atua ma le olioli, semanu e le o’o mai i se 50 tausaga o tatou ave pea le vi’iga i le Atua i lenei malumalu.” Ina ua mae’a sa fa’ataunu’u loa le vaega o le sauniga mamalu, e tutuina ai moli ga’o, ina ia ‘avea pea le sulu o le malamalama i tupulaga o i le lumana’i, ma ia manatua fo’i i latou na asa le gasu o le taeao, o nisi ua faiilagi le folauga, ae o nisi ua tatou mafuta pea, a’o nisi ua galulue mai nisi itu o le lalolagi ma ua latou toe fa’atutuina nisi lala fo’i o le galuega!

 

O le susuga Poe Mageo sa ia ta’ita’ia lea vaega o le sauniga, ma sa ia tolaulauina ai: Moli ga’o muamua mo i latou uma sa galulue mai le amataga 1964 se’ia o’o mai i le 1989 - sa tu’uina le avanoa i se tasi o alo tama’ita’i o Laulu na te tutuina lea lamepa, le tama’ita’i o Rebecca Laulu-Seumanu.

 

O le moliga’o lona lua o le moli lea mo i latou uma na auai i le Ekalesia mai le tausaga e 1989 se’ia pa’ia le tausaga 2014, ma sa tu’uina lea avanoa i se aiga fou lava fa’ato’a fai matafale i le ekalesia - Tufa Sevao Sr.

 

O le moliga’o lona tolu sa tutuina lea mo le Tupulaga Talavou i le taimi nei, o i latou ia i o latou tau’au lu’iga o le itu i le tino fa’apea ma le itu fa’aleagaga o le Ekalesia i lana folauga i le lumana’i - sa tu’uina lea moli e tutu e se tasi o tupulaga talavou.

 

Moliga’o lona fa sa tutuina lea e se tasi o le aiga o le Fa’afeagaiga Taulagi, ua atoa lelei le 50 tausaga o lana auaunaga i le Atua, ma o se lamepa e fa’ailoa ai, o lo’o ia te ia pea le lotomau i le galuega a lona Matai, ma e fa’aauau pea lana auaunaga, ma le sapaia fo’i e lana fanau o lea mau i totonu o le latou aiga. O le sao lea sa tu’uina atu ia Diana Mageo-Aitaoto.

 

Moli mulimuli, o le moli lea e toe aualofa atu ai, ma fa’afetaia le sao sa fa’atino e nisi o sui totino o le Ekalesia ua fai i lagi le folauga, ae o latou galuega, ua se’e ai i ma’a o malie le Ekalesia e o’o mai i lenei taimi. O lea moli sa tutuina lea e le Faletua ma o se suli o le susuga Otto Haleck - Sera Haleck Tuitele. Ina ua mae’a lea sa i ai se 3 minute na o filemu sa tu’uina mo se toe tatalo e fa’afetaia ai le Atua i le loto tetele o e na amatalia lea sulu i totonu o Lepuapua, ma ua malamalama ai le to’atele.

 

Ina ua mae’a sa tu’uina se avanoa ia Rev Siaosi Mageo mo se tala o le galuega, peita’i, sa ia fa’ailoa mai, “Ao tau amata mai, e le’i faigofie lava, peita’i, o lenei vaitaimi, ua tatou sapi i mea e tele, ae ia faia mea uma e vi’ia ai le Atua. O le Ekalesia sili lava, o le autalavou, i latou e fa’aauauina le folauga i le lumana’i mo le Ekalesia ma le Upu a le Atua! Peitai, o le Ekalesia moni lava i le taimi nei, ua i ai lea i la’u aulotu fou, ‘Little Lites’ po’o le vasega o talavou laiti o lo’o fa’afailele nei.”

 

O le taimi lea sa ia talosagaina ai loa ma se avanoa se’i pese ai vi’iga na tapena i ai le fanau talavou, ma fa’ai’u ai le sauniga mamalu.

Comment Here