E to’alua ni leoleo sa faatauto la te puipuia le tulafono, ua molia ma tuuaia e le malo, i lo la soli lea o se vaega o le tulafono na la tauto la te puipuia ma faamalosia, e afua mai i le faalavelave lea na aveese mai ai e ni tamaitai se toalua ni iPod mai le faleoloa a le ACE Hardward i Malaeimi i le masina o Novema 2010.

O leoleo e toalua e aofia ai Siufaalele Sai, lea na tulai i luma o le faamasinoga faaitumalo i le taeao ananafi, ma Talia Seloti e le o i ai o ia i le atunuu i le taimi nei, ae o loo i ai le faamoemoe o se aso o i luma e tulai ai o ia i luma o le faamasinoga, mo le tuuina atu o sana tali e tusa ai o lenei mataupu.

O lo o tuuaia ai foi e le malo se tamaitai talavou i lona aveesea mai o iPods ia e lua mai totonu o le ACE.

O Sai o lo o tuuaia i moliaga mamafa e lua e aofia ai lona ave faagaoi o ni mea totino sa tuuina atu i lalo o lana vaavaaiga, faapea ai ma lona taumafai e faaleaoga ni mea molimau a le malo.

O le taeao nei lea ua faamoemoe e toe fofogaina ai le mataupu a Sai ma le tamaitai talavou lea o loo tuuaia faatasi i laua i lenei mataupu, e iloilo ai pe mananao e faataunuu a laua ulua’i iloiloga e iloilo ai e le faamasinoga mau a le malo e uiga i lenei mataupu, pe tuu sa’o atu foi a la mataupu i luma o le faamasinoga maualuga e faataunuu ai a laua faamasinoga.

I faamaumauga a le faamasinoga o lo o taua ai e faapea, o le masina o Novema 2010 na tulai mai ai le mataupu lenei, ina ua faafesootai e le kamupani a le ACE le ofisa o leoleo mo se fesoasoani, ona o le faalavelave lea na aveese mai ai e ni tamaitai talavou se toalua ni iPod se lua mai totonu o le faleoloa.

Na taua i faamaumauga a le malo e faapea, na maua e nisi o le aufaigaluega a le ACE i luga o masini pu’eata gaioiga sa faia e tamaitai nei e to’alua, i lo la aveeseina lea o iPod e lua mai luga o fata e teu ai oloa.

Na taofia e nisi o le aufaigaluega a le ACE i laua ia e faatali ai le taunuu atu o leoleo, ma auina atu ai loa i laua i le ofisa mo suesuega, mulimuli ane ai na toe tatala i tua ae faafoi atu i leoleo iPod sa la aveeseina mai i totonu o le faleoloa.

O tamaitai e toalua na taofia e leoleo ona o lenei mataupu e aofia ai Rockshane Siaki ma Catherine Michaels.

Ina ua fesiligia e leoleo Siaki ma Michaels e uiga i iPod, na ta’utino ai Siaki i le alii leoleo o Det. Vaofanua e faapea, o ia na aveeseina maia iPod mai le faleoloa ae le o lana uo o Michaels. Sa la tuuina atu foi i le iPod lanu moana  i leoleo i le aso na taofia ai i laua, ae o le isi iPod na mulimuli toe faafo’i atu i le ofisa o leoleo.

O le tamaitai leoleo ia Sai na tuuina atu i ai le iPod lanu moana lea e $79.99 lona tau mo le faia o se ripoti, ma ia tuuina atu i le potu o lo o teu ai mea molimau uma a le malo e teu ai.

O le aso na soso’o ai na livi ai Sai mo le faamoemoe e alu e momoli lona tina i fafo mo lana talavai, o lea na tuu atu ai loa i le alii leoleo o Seloti le taulimaina o le isi iPod lanu pa’epa’e siliva lona lanu e lua i ai iPod na gaoia mai le ACE, lea e $199.00 lona tau, ina ia fai se ripoti ma tuu atu e teu i le potu e teu ai mea molimau a le malo.

Ina ua le mafai e leoleo ona maua iPod mai totonu o le potu e teu i ai mea molimau a le malo, na fesiligia ai loa le tamaitai loia ia Sai ma Seloti e uiga i iPod na tuuina atu ia te i laua.

Na faailoa e Sai i leoleo e faapea, ina ua tuuina atu le iPod lanu moana ia te ia mo le faia o se ripoti ma tuuina atu i le potu e teu ai mea molimau a leoleo, na te le’i faia se ripoti e pei ona faatonuina ai o ia, ae sa alu ma ia le iPod i lona fale.

Ina ua fesiligia foi Seloti e uiga i lenei mataupu, sa ia taua foi le leai o se ripoti na ia faia e pei ona faatonuina ai o ia, ae sa alu ma ave le iPod i lona fale.