Ads by Google Ads by Google

To’aiva ua filifilia i le Komiti Faafoe Vaega Tosova’a

E to’a 9 i latou ua tofia e le alii kovana e fai ma totino o le Komiti Faafoe a le Vaega Tosovaa i Satala e suia mai ai i le to’a 5 e pei ona i ai i le nofoaiga a Togiola ma Faoa ua mavae atu.

 

Ua toe filifilia e le afioga i le kovana sili, Lolo Matalasi Moliga ia David Robinson ma Leilua Stevenson, o isi sui e aofia ai Unasa Leroy Ledoux, lea sa avea maumua ma Faatonusili o le Matagaluega o Uafu ma Taulaga; Doug Harrington lea sa avea muamua ma pule o le Vaega Tosovaa; o Capt. Wallace Thompson; o sui e toalua o kamupani i’a i le atunuu ia Joe Carney mai le StarKist ma Mike Wisneske o le Tri Marine, atoa ai ma Galumalemana Bill Satele lea sa avea muamua ma faipule, ae o ia foi o se alii faipisinisi, ma le susuga a Louis Solaita mai le Solar Environmental Inc.

 

I se poloaiga na sainia e le alii kovana ia Lolo ao le’i tuuvaa atu mo lana malaga i le laumua i Uosigitone, sa ia taua ai e faapea, o sui o le Komiti Faafoe ua ia tofia, o le a mafai ona latou galulue faatasi mo le manuia o le tautua a le Vaega Tosovaa i le atunuu.

 

Sa ia taua foi e faapea, o i latou ua tofia o lo o i ai le agavaa i tulaga tau pisinisi, tulaga tau puleaina o galuega, faiga faiva aemaise ai o tulaga i fale i’a mataupu tau i le siosiomaga.

 

E eseese uma ua faamoemoe e faamuta ai le tautua a i latou nei i totonu o le komiti faafoe, e pei ona saunoa le alii kovana ia Lolo.

 

O le susuga ia Wisneske ma Carney lea ua fai ma sui o pisinisi tumaoti tetele i le atunuu, e ta’itasi tausaga o le a galulue ai i laua i totonu o le komiti faafoe; o Galumalemana ma Solaita e ta’i 2 tausaga e galulue ai; ae o Unasa, Harrington ma Thompson e ta’i 3 tausaga e galulue ai i latou.

 

O le eseese uma o agavaa ma galuega sa galulue ai i latou nei, ua talitonu ai le alii kovana, o le a avea lo latou galulue faatasi i le komiti e tuufaatasia ai le tomai ma le iloa ua latou maua mo le manuia o le Vaega Tosovaa.

 

O Harrington ua malolo litaea mai le tele o tausaga na avea ai o ia ma pule o le kamupani a le Hawthorne Machinery.

 

O Thompson o lo o avea ma kapeteni lautogia mo le vaega a le U.S Coast Guard, ae o Galumalemana, e le gata o ia o se alii faipisinisi na tautua mo le kamupani i’a, ae sa avea foi ma sui o le fono faitulafono e malamalama i gaioiga tau tulafono.

 

Ua i ai le faamoemoe o le alii kovana, o ana tofiga uma ia ua faalauiloa ao malolo ai le fono faitulafono mo le 3 vaiaso, o le a mafai ona tuuina atu i luma o le fono mo le faamaoniaina, pe afai ae toe tauaofia galuega masani a le fono i le aso 4 Mati, 2013.

 

faaliliu Ausage Fausia