Na fa’ailoa e le afioga i le ali’i faipule ia Taotasi Archie Soliai i luma o le maota o sui i le taeao ananafi, afai ae pasia e le Fono Faitulafono le pili lea ua fa’aulu e sii ai totogi o le kovana ma le lutena kovana faatasi ai ma suiga, o le a matua a’afia ai i latou sa avea ma kovana i le atunuu i aso ua mavae ma o latou faletua.

Na avea le fautuaga poto mai le afioga i le alii faipule ma itu na toe fautuaina ai loa e le Fofoga Fetalai le Taitaifono o le Komiti o le Paketi a le maota, ina ia toe tuu atu le pili i le komiti e toe vaavaai ma toe fai i ai ni isi suiga.

O le taeao ananafi na fuafua le komiti e faitau fa’alua ai le pili mo le siitaga o totogi o le kovana ma le lutena kovana fa’atasi ai ma suiga, i le tuana’i ai o iloiloga faapea ai ma fetufaaiga a afioga i faipule sa faia i lenei mataupu i le vaiaso na te’a nei.

O le mae’a ai ona fa’alauiloa e le taitaifono o le komiti o le paketi ia Timusa Tini Lam Yuen o suiga muamua i le tulafono, na faia ai loa le fautuaga e toe taoto le pili i le komiti mo sa latou fa’aiuga.

O suiga e aofia ai le sui mai o pasene o penefiti e maua e le kovana ma lona faletua pe a tuana’i le taimi la te nofoia ai le nofoa, mai le 60% i le 50% mo le kovana, ae o lona faletua e sui i le 25% mai le 30% o lo o i ai.

Saunoa Taotasi e fa’apea, afai e pasia e le fono le sii o totogi o le kovana ma le lutena kovana i le $125,000 ma le $100,000, ona talafeagai ai lea o suiga i pasene e pei ona finagalo i ai le komiti, ae o le a aafia ai i latou sa avea muamua ma kovana atoa ai ma o latou faletua i le suiga o le tulafono, ona o lo o fuafua a latou alauni i totogi sa latou maua e $85,000 e pei ona i ai le tulafono i le taimi nei.

Sa i ai ni isi o afioga i faipule sa latou fia malamalama i isi suiga o le tulafono, e aofia ai le aofa’i o le totogi o le kovana ma le lutena kovana e tatau ona i ai.

I iloiloga sa faia a le komiti e tusa ai o le tulafono tau faaofi lenei, sa faatuina ai e ni isi o afioga i faipule le mau, ina ia sui le aofai o le totogi o le kovana ma le lutena kovana o lo o taua i totonu o le tulafono taufaaofi lenei, mai le $125,000 ma le $100,000 i le $150,000 ma le $125,000, lea fo’i na lagolagoina e ni isi o sui o le komiti.

E talitonu ni isi o faipule, e le tatau lava ona i ai se isi tagata faigaluega i totonu o le malo o Amerika Samoa, e le gata i matagaluega ae faapea foi i ofisa ma vaega tumaoti a le malo, ona sili atu lona totogi i le totogi kovana ma le lutena kovana.

O le taeao nei lea ua faamoemoe le komiti e toe tuuina mai ai le tulafono i luma o le maota o sui mo le faitauina fa’alua.