Ads by Google Ads by Google

To’afa totino Komiti Fa’afoe o le Litaea pasia e le Senate

E to’afa totino o le Komiti Fa’afoe o le Litaea a le malo na pasia e le Senate i le taeao ananafi, ae to’atasi na teena ina ua palota le maota maualuga i tofiga a le kovana i le Fono Fa’apitoa o lo o nofoia i le taimi nei.

 

O le sui e to’atasi na teena o le susuga i le Teutupe a le malo ia Dr. Falema’o Phil Pili, lea e na o le 6 ana palota ioe ae 10 ana palota leai, ae sa tatau ona maua palota e 10 e mafai ai ona pasia o ia e avea ma totino o le Komiti Fa’afoe, ma o le fa’alua ai lea ona teena e le Fono le suafa o Pili e avea ma totino o le Komiti Fa’afoe.

 

O sui e to’afa na pasia e aofia aofia ai Sonny Thompson ma Aleki Sene Sr e ta’i 12-4 la palota; o Maaelopa Bob Tuiasosopo e 13-3 lana palota, ma le afioga i le ali’i senatoa ia Magalei Logovi’i e 11-5 lana palota.

 

O le tofiga e tasi a le kovana e le i iloiloina e le komiti o Litaea a le Senate, o le susuga ia Beaver Ho Ching lea o lo o malaga i fafo i le taimi na tauaao ai e le Fono tofiga a le kovana e faatatau i le Komiti o le Litaea.

 

O le aso Faraile o le vaiaso nei lea ua faamoemoe e toe taliu mai ai i le atunuu le susuga Ho Ching, ma ua faamoemoe o le aso Gafua o le vaiaso fou e fesiligia ai e le komiti ona agavaa e tusa ai o tofiga a le kovana.

 

O le faaiuga a le senate e pasia ai sui e toafa ae teena le toatasi, sa faia ina ua maea se iloiloga sa valaauina e le komiti a le afioga ia Avegalio Aigamaua i le taeao ananafi, e fesiligia ai agavaa o i latou ua tofia i lenei komiti.

 

Ina ua fesiligia i le tulaga o teugatupe a le litaea o lo o i ai, na taua ai e le susuga Sene Sr e faapea, o le tala fiafia mo le atunuu, e $5 miliona lea ua siitia ai le teuga tupe a le litaea e pei ona taua i ripoti i lenei vaiaso.

 

I le lumana’i o teuga tupe a le litaea mo tagata faigaluega, na mafua ai ona fesiligia e le afioga i le alii senatoa ia Faumuina Tagisiaali’i le afioga ia Magalei ma Sene Sr, pe o le a se tulaga e ono oo i ai le teuga tupe a le litaea mo le isi lua tausaga o lo o lumana’i nei.

 

Na faamanino e Sene Sr e faapea, i le faaiuga o le tausaga tupe 2013 ua mavae atu, e $211 miliona le aofa’i o le teuga tupe a le litaea a le malo o lo o i ai, ae o le ripoti e pei ona tuuina mai i le vaiaso nei, ua siitia i le $216 miliona.

 

O se tasi o fautuaga sa tuuina atu e le komiti i totino o le litaea a le malo, o le vaavaai lea i ni auala e faaopoopo ai penefiti o lo o totogi atu mo tagata litaea a le malo, aua o se tasi lea o auala e mafai ai ona fesoasoani i le tausiga o aiga, aemaise lava mo i latou e maualalo le tamaoaiga o lo o maua.

 

Na faamanino e Sene Sr i luma o le komiti e faapea, o tausaga ta’i lua uma lava e iloilo ai e le komiti faafoe le tulaga o lo o i ai le teugatupe, pe ua talafeagai ona fai se siitaga e amata mai i le 1% e oo atu i le 3%, po o le leai fo’i o se si’itaga e faia.

 

Na faaiu fautuaga a afioga i senatoa i lo latou fautuaina lea o totino o le komiti, afai loa e pasia i latou e avea ma totino o le komiti o le litaea, ia faaauau pea ona latou galulue i auala e faaleleia ai teugatupe, ina ia mautinoa e malu puipuia mo le lumana’i o tagata faigaluega a le malo.