Ads by Google Ads by Google

TO’A 9 AUMALAGA ASIA AAI PAIA I ISARAELU

E to’a 9 le aofa’i o se aumalaga ua sauni latou te asia le aai paia i totonu o Isaraelu, le nofoaga na feafioa’i ai le Faaola faapea ai le Perofeta fai faaaliga a le Atua o Bahaullah lea e pei ona fa’auluulu i ai le Faatuatuaga Baha’i i le lalolagi ma Amerika Samoa nei.

O lenei aumalaga e aofia ai le susuga ia Taituuga Papalii, o lona faletua ia Tofaimalae ma o la alo e toalua, faapea ai lona uso o Satele Iupeli Kava, o lona faletua ma o la alo e toalua, faatasi ai ma se tamaitai talavou o le Faatuatuaga Baha’i o Matalena Tasele.

Na taua e le susuga Taituuga, o le latou malaga sa amata fuafua mai i le tausaga na te’a nei ma le faamoemoe, o le a faataunuuina pe a maea faauuga a le fanau i le tausaga aoga lenei.

“O lea la ua maea faauuga a le fanau, ma ua matou manatu ai loa e faataunuu le faamoemoe e pei ona fuafua mamao mai,” o le saunoaga lea a Taituuga.

Sa ia taua foi, o le autu atoa o lenei malaga, o le fia molimauina lea ma vaai tino i le nofoaga ma le aai sa savalia e le auauna fai faaaliga a le Atua, ina ia mafai ai ona latou molimauina le ofoofogia o galuega sa ia faia.

“Soo se tagata Baha’i lava, o le faanaunauga lava lea o lona loto ao soifua, e fia oo e vaai ma molimauina nofoaga ma le aai paia sa savalia e le mamalu o le Atua, poo Bahaullah le fai faaaliga a le Atua, o le autu moni foi lena o lenei faamoeome,” o le saunoaga lea a Taituuga.

O lenei malaga o loo faatupe lava e Taituuga ma Satele ma o la aiga, ma o se avanoa lelei foi lea latou te feiloai ai ma isi foi alo Samoa o loo galulue ai i le aai paia, i le avea ai o i latou ma misioane a le Atua aemaise ai o le faia o le galuega o le Toe Fuataina i le talalelei.

O le po o le aso Sa o le vaiaso fou ua faamoemoe e tuua ai e le au malaga lenei le atunuu mo Hawaii, faasolo atu ai i Kalefonia ma malaga tuu sa’o atu ai loa i le aai o Tel Avivi i Isaraelu.

O le susuga Taituuga ma lona aiga e toe taliu mai pe a tuanai le masina ae o Satele ma lona aiga e lua masina o le a malaga ese atu ai.