Ads by Google Ads by Google

To’a 5 sui Komiti Fa’afoe Litaea ua teena e le Senate

Na teena e le maota maualuga a le Senate i le taeao ananafi sui e to’alima o le Komiti Fa’afoe o le Litaea na tofia e le alii kovana ia Lolo Matalasi Moliga, se’i vagana ai sui e to’alua na pasia i le taimi o le palota.

 

O i latou e to’alima na teena: Dr. Falema’o ‘Phil’ Pili e 4 ana palota ioe ae 11 ana palota leai (4-11); Faoa Aitofele Sunia ma Sonny Thompson e 8-7 a la palota sa maua, ma Lauvao Haleck ma Maea Tuiasosopo e ta’i 9-6 a la palota sa maua. E sefulu palota “ioe” e pasia ai.

 

O sui e to’alua na pasia e aofia ai Aloma Langford e 12-3 lana palota sa maua, ma Tofala Iafeta e 10-5 lana palota sa maua.

 

O le fa’aiuga a le Senate na faia lea ina ua mae’a se iloiloga na valaauina e le Komiti o le Litaea a le maota maualuga i le taeao ananafi, e fesiligia ai agava’a ma tomai o i latou nei, i lalo o le ta’ita’iga a le afioga i le ali’i senatoa ia Avegalio Aigamaua o le ta’ita’i komiti.

 

Na tatala lava le iloiloga i se fautuaga sa tuuina atu e le afioga i le ali’i senatoa ia Alo Fa’auuga aga’i i sui filifilia o le Komiti o le Litaea, ina ia fa’amaoni i le fa’atinoina o a latou tiute, o i latou lea ua tofia e vaavaaia tupe o litaea a tagata, o le afu toto lea o le atunuu e tua i ai i le lumana’i.

 

“A fa’aletonu ona fa’atino la outou galuega, lona uiga ua uma le ola o le atunuu, aua o tupe na o le afu toto o le atunuu,” o le saunoaga lea a Alo.

 

(O le aso Lulu na te’a nei na fesiligia ai e le komiti o le Litaea a le maota o sui totino o le Komiti o le Litaea sa tofia e le kovana, ae le i faia i ai la latou palota.)

 

Na fesili le afioga i le alii senatoa ia Galea’i Tu’ufuli i sui uma o le komiti o le Litaea, pe o le a so latou manatu pe afai e talosaga atu le Faletupe fou (Community Bank of American Samoa) lea o lo o tau fa’atu i totonu o Amerika Samoa i le Vaega o le Litaea mo se nonogatupe e inivesi i le Faletupe, pe o se mea tatau ona latou taliaina pe leai fo’i.

 

Na taua e Falema’o e fa’apea, e faigata tele pe afai e nono atu e le Vaega a le Litaea se vaega tupe i le Faletupe lea, aua e le o iloa tonu pe manuia taumafaiga a le Faletupe mo le lumana’i.

 

O le isi tulaga na faamanino e Pili, afai fo’i e inivesi e le Vaega a le Litaea se vaega tupe i le Faletupe, e umi se taimi fa’atoa maua mai se tupe tului, aua toe alu uma le tupe i faagaioiga a le Faletupe fou ma ana galuega tau amata.

 

Ae na taua e Faoa e fa’apea, o lo o i ai le avanoa e mafai ai ona inivesi atu tupe a le Litaea mo atina’e lotoifale i le maualuga e 10% mai teugatupe a le Litaea o lo o i ai, ma, afai e talitonu le Fono o le Faletupe fou lea o lo o tau fa’atula’i o se atina’e lotoifale, o le faaiuga lena latou te faia pe afai e tatau ona nono atu se vaega tupe e inivesi ai.

 

O se tasi o tulaga faaeteete gata e pei ona saunoa Faoa, o le fiu e tau faatali se tupe tului e maua mai i le tupe o le a inivesi i le Faletupe, ona o lo o tau faatino ana gaioiga mo le tau amataina o lana tautua.

 

Na faamanino e Galea’i e fa’apea, o le isi lea auala na amata ai le Faletupe a Amerika Samoa lea ua fa’atau atu nei i le ANZ ina ua faatoa tatala i tausaga ua mavae, ma o se tulaga sa tulaga manuia ma ola ai gaioiga a le faletupe, e ui sa to’atele tagata o le atunuu na tuu fesili i le lumana’i o gaioiga a le faletupe, peitai na i’u manuia taumafaiga a i latou sa faafoeina maia le faletupe, lea ua i’u ina toe fa’atau ese atu.

 

Na faailoa e le afioga ia Mauga T. Asuega i le komiti se tasi o popolega o lo o nonofo ma ni isi o le atunuu, o tulaga i nonogatupe o lo o fai mai i teugatupe o le Litaea.

 

Saunoa Mauga, o se tasi o itu e faigata ai le galuega a le komiti, aua afai e tutu faatasi le kovana ma le Fono e lagolago se nonogatupe, e leai lava se gaioiga a le Komiti e fai, ae o le itu taua, ia silafia e le Komiti tulaga o lo o i ai teugatupe a le litaea o lo o i ai.

 

O ni isi o saunoaga mai sui o le komiti a le maota maualuga, o fautuaga sa tuuina atu ia i latou ua tofia e le kovana, ina ia faamaoni i le faatinoina o le galuega ma puipui malu i tupe o le litaea a le atunuu.