E to’a 43 i latou ua fa’au’uina mai i le Aoga Kuka lona 5 lea sa fa’atautaia e le Matagaluega o Tupulaga Talavou, Tina & Tama’ita’i (DYWA), ma ua tauaao atu i ai tusi pasi ina ua mae’a ona a’oa’oina i latou i auala eseese e fa’atinoina ai so o se ituaiga kuka, lea sa faia mo le umi e 10 vaiaso.

Na fa’atumulia le maota o lo o fa’aaogaina i polokalame a le Ofisa o Aoga i Utulei, le nofoaga tuai lea sa i ai le Ofisa o Palota i uo ma aiga, aemaise ai matua ma fanau a le au fa’au’u, lea na lolofi atu i le molimauina o le fa’aiuga ua mafai ona ausia e le vasega fa’au’u.

Mai le to’a 43 o i latou sa maua tusi pasi, o le to’a 39 o i latou o tama’ita’i ma le to’afa o ali’i.

Na taua e le afioga a Pa’u Roy Ausage mai le DYWA e fa’apea, e ui i le faigata o le tau sailiina o se nofoaga mautu e fa’atino ai le aoaoga lenei, peita’i sa mafai lava ona maua le avanoa ma fa’ataunu’u ai loa le polokalame, i lalo o le ta’ita’iga a le tama’ita’i Faiaoga Kuka ia Maria Masalosalo, o se tasi fo’i sa fa’au’u mai i ulua’i aoga kuka ua mavae atu.

“O le taua o polokalame nei a le Matagaluega, e mafai ai ona fa’aopoopo le tomai ma le agava’a i so o se tasi o lo o naunau e fia maua se isi auala e aoaoina ai o ia i matata ma aoaoga eseese,” o le saunoaga lea a Pa’u i luma o le au fa’au’u.

O le aoga kuka lona lima lea ua mae’a nei, sa fa’ataunu’uina lava i le maota o Pa’u ma le fa’amoemoe, e tatau ona o o atu i se isi aoga kuka o lo o soso’o nei ua fa’atinoina loa i le nofoaga fou lea ua fa’amoemoe e aga’i atu i ai le Ofisa i Pago Pago.

O le faletua ia Maria Tootoo mai le Matagaluega o Aoga, na saunoa i le saunoaga autu o le aso. “O avanoa fa’apenei, e le gata e maua ai le tomai fa’aopoopo mo oe, ae o se avanoa fo’i e maua ai se isi tupe fa’aopoopo mo oe ma lou aiga, e ala i galuega e maua mai ai, po o le fa’atuina fo’i o sau lava pisinisi fale’aiga,” o le lu’itau lea mai le faletua ia Tootoo.

Na taua e le faletua ia Masalosalo e fa’apea, o ituaiga kuka sa ia a’oa’oina i totonu o le 10 vaiaso, e mafuli lava i ituaiga kuka e gafatia i le tupe fa’asoa a aiga e vaivai le tamaoaiga.

“Ina ua amata le aoaoga lenei, sa ou mafaufau ai e fa’asoa i le vasega fa’au’u ituaiga kuka e gafatia e le tamaoaiga o latou aiga, aua o le tele o aoga kuka i taimi nei, e aoaoina ai na o ituaiga kuka e taugata mea e fa’atupe ai, peita’i o le aoga lenei, e le gata sa aoaoina ai ituaiga kuka e faaaoga i aiga tetele, ae sa aoaoina ai fo’i kuka e fa’apitoa mo aiga to’alaiti ma vaivai le tamaoaiga,” o le saunoaga lea a Masalosalo, lea fo’i na fa’amaonia e se tasi o le vasega, le susuga ia Alapati Visesio i lana molimau.

Na taua e le susuga Visesio e fa’apea, talu ona soifua mai i lenei olaga, na te le i iloa lava kuka se keke pe fai fo’i se supo e aai ai lona to’alua ma lana fanau, ae ina ua uma le aoaoga lenei, e le gata e lua keke o le ituaiga o le ‘Keke Karioti’ ua ia tao ma aai ai lona aiga, ae sa sili fo’i ona fiafia lona aiga e aai i le ulua’i supo ua ia faia.

“O le a ou le toe malolo i le kukaina o meaai e aai ai lo’u aiga, ina ua ou iloa ua ia te a’u le tomai ma le agava’a e faia ai so o se kuka e fia aai ai si o’u to’alua ma la’u fanau,” o le saunoaga lea a Visesio na tali e ai le vasega fa’au’u ma le au valaaulia, ina ua tofia o ia e saunoa fa’afetai i le Faiaoga Kuka.

Ina ua fesiligia e le Samoa News le susuga Visesio po o le la le isi la’asaga lea o le a aga’i atu i ai, na ata le ali’i ma fa’apea mai, “e leai lava se isi mea e toe fa’atali ai, o le saili loa o se galuega i so o se faleaiga i le atunu’u e galue ma maua ai se tupe, ma fa’atalitali le isi vaega lua o le matou aoga kuka lea o le a soso’o nei, a le o lena fo’i, o le alu loa e aoga i se isi aoga e a’o ai le tui teu, su’isu’i po o isi fo’i agava’a eseese”.