E to’a 40 alii ma tamaitai leoleo ua siitia a latou tulaga i totonu o le Matagaluega o le Puipuiga o le Saogalemu Lotoifale, e pei ona ta’ua i se pepa o faamatalaga na saini ai le afioga i le Komesina o Leoleo, le tofa Tuaolo M. Fruean i le aso 28 Iuni, mo i latou o lo o galulue i le Ofisa o Leoleo, Fale Fuimu, Marine Patrol ma le Toese i Tafuna.

O suiga e aofia ai le susuga Vaimauga Maiava lea ua avea ma Taitai Leoleo (Police Chief), to’atolu ua maua faailoga o Commander e aofia ai le pule o le toese i Tafuna ia Lumana’i Maifea, ta’ita’i o le Vaega Suesue a le CID ia Lavata’i Taase Sagapolutele ma le leoleo a le kovana ia Alapati Fano.

O isi suiga e aofia ai kapeteni e to’aono, to’a 12 Lutena, to’a 10 Satini, PSO III e to’alima ma PSO II e to’atolu.

Na taua e Tuaolo, o tulaga ua siitia mo alii ma tamaitai leoleo ua aloaia nei e faatumu ai tulaga sa avanoa.

Sa ia faamalo ia i latou uma ua faamanuiaina i suiga e pei ona faia e le matagaluega, faatasi ai ma lana tatalo ina ia faatino a latou tiute i le mea sili e gata mai ai lo latou malosi aua le tautuaina o le atunuu, ma sa ia talosagaina le matagaluega atoa ina ia tuu atu la latou lagolago ia i latou uma ua faamanuiaina i suiga e pei ona aloaia.

Ae i le tuuina mai ai o nei suiga, sa faaalia ai le faasea a nisi o leoleo ona e manatu i latou, e le talafeagai le faaiuga ua faia e le matagaluega.

Na taua e se tasi o leoleo ua tele tausaga o lana tautua i le matagaluega, e le o talafeagai suiga i tulaga ua faia e le matagaluega o leoleo, ona o loo vaai pito tasi lava le faaiuga ae le o iloilo auiliili ma mae’ae’a ituaiga leoleo e tatau ona siitia a latou tulaga i totonu o le matagaluega.

O isi faasea na afua mai i nisi o leoleo o lo o galulue i le Toese i Tafuna, i le leai o ni siitaga ua faia mo i latou, sei vagana ai le pule o le toese lea ua siitia i le Commander lona tulaga.

Ae o le faasea a le isi leoleo sa aga’i i leoleo e to’alua o lo o aofia ai i suiga ua faalauiloa, ae sa i ai a laua solitulafono na faamaonia e le faamasinoga, lea na loka ai le isi ae faanofovaavaaia le isi.

“O ituaiga faamaumauga na e tatau ona vaavaai i ai le matagaluega, o le iloilo lelei lea o faamaumauga a leoleo ma latou gaioiga sa faia, aua o le isi leoleo na faatino le solitulafono ao fai lana toniga leoleo, ae o le isi leoleo sa faatino le solitulafono a’o i ai i lona aiga,” o le faasea lea a le leoleo lea.

O alii leoleo e to’alua o lo o agai i ai faasea o Det. Siaosi Aiono lea ua siitia i le tulaga Kapeteni lona tulaga, ma Sgt. Abel Penitusi lea ua siitia i le tulaga Satini.

O Cpt. Aiono na loka i le toese i Tafuna mo le umi e 8 aso ia Aokuso 2009, ina ua faamaonia e le faamasinoga faaitumalo le moliaga o le faatupu vevesi i nofoaga faitele na tuuaia ai o ia, ma faatonu ai loa o ia e le alii faamasino o John Ward II ia taofia ai o ia i le falepuipui mo faaiuga o vaiaso soso’o e fa, amata mai i le itula e 6:00 i le afiafi o le aso Faraile ae tatala i tua i le itula e 6:00 i le afiafi o le aso Sa.

O le faasalaga a Cpt. Aiono na afua mai i le faalavelave lea na ia uu ai le ua o se alii ave pasi i luma o le kamupani o le StarKist Samoa i le aso 23 Iulai 2009, a’o ia loka ona lima i le handcuffs.

O Sgt. Penitusi na faanofovaavaaia e le faamasinoga faaitumalo, ina ua faamaonia le moliaga o le faaoolima sa tuuaia ai o ia, i lona faapaina lea o se fana ma manu’a ai le vae o se isi tagata.

Sa tuuaia o ia e le malo i le faaoolima, umia ma le faaaoga faasolitulafono o se aupega, ona o se faalavelave na tulai mai ia Iulai 2005.

E lei i ai se faasalaga faafalepuipui na tuuina atu e le faamasinoga ia Sgt. Penitusi, ae sa faamalolo le tumau o ia mai lana galuega faaleoleo, peitai na toe valaauina ina ua mae’a lana mataupu.

Na taua e le isi leoleo, sa i ai foi le isi leoleo na faamaonia lana solitulafono ma loka ai i le falepuipui, peita’i e le’i toe valaauina o ia e avea ma leoleo, ae o isi leoleo sa tuli foi a latou faasalaga ona o solitulafono na faamaonia e le faamasinoga, o loo galulue pea e avea ma leoleo.

Lisi o leoleo ua siitia tulaga: KAPETENI: John Cendrowski, Lima Togia, Pierre Clements, Pou Supapo, Aloalo Olo ma Clint Ilaoa. LUTENA: Fautua Maiava, Tolia Solaita, Faimasasa Malaefono, Siaosi Aiono, Falelua Salafuauli, Iati Tuiolemotu, Tautalasoo Moliga, Arieta Salanoa, Faafetai Filipo, Preschool Talaeai, Fusitele Fano ma Sefo Palepua. SATINI: Abel Penitusi, Misi Leo, Steve Tuatoo, Fomai Paepule, Sili Sea, Vaina Vaofanua, Utumoe Alefosio, Talamakusi Taumua, Allen Velega ma Mike Tipoti. PSO III: Polofaasoa Pese, Poe Leapai, Ioane Galu, Hesedh Sopoaga ma Sapu Maiava. PSO II: Siaosi Siuloa, Mareko Fale ma Daryl Parker.