Ads by Google Ads by Google

TO’A 23 MAUA TUSI PASI AOGA SU’ISU’I

E toa 23 i latou na maua a latou tusi pasi mai le Aoga Su’isu’i sa faatautaia e le Matagaluega o Tupulaga ma Tina, e pei ona faaiuina i le aso Lulu o le vaiaso nei.

O lenei polokalame sa faatupeina e le Matagaluega o Faamasinoga, ma e 70 itula sa aooga ai i latou sa auai, tusa lea o le 3 masina le umi, i lalo o le taitaiga a le tamaitai faiaoga ia Johanna Samana.

O se sauniga puupuu sa faia na mafai ai ona molimauina e sui o le malo, uo ma aiga aemaise ai taitai o le atunuu le taualugaina o lenei polokalame.

Na taua e kovana Togiola Tulafono i lana saunoaga autu, o ia foi e iloa su’isu’i aua sa a’oa’oina ai o ia e lona tina ao laititi,

Na ia saunoa e tusa ai o le tamaoaiga masa’a atu i fafo o le atunu’u, ona ua tatou fiafia e fa’atino e nisi lenei fo’i taleni, ae ua le taumafai i tatou ia mautu o tatou ia tomai. “O le tulaga ua tatou i ai nei, ua tatou fiafia i matagofie o galuega su’isu’i a nai uso Filipino, ona tatou fiafia lea tatou te la’eia ofu matagofie, ae fiafia i latou nei e ‘ave’ese atu le tupe mai lo tatou malo!”

Ua ia fa’apupula atili le fa’ata’amilosaga o le tamaoaiga, “O le umi ona ta’oto o le tupe i le tatou lotoifale, ua sili ona aoga o le tupe lena i lo tatou tamaoaiga i le atunu’u, peita’i, o le tala lava e vave ona ave’esea atu i fafo, ua le aoga lea ia i tatou, ma ua tatou fiu ai e saili le tamaoaiga tumau o le tatou malo!”

O le mau na fa’ataoto mo le Matagaluega o Tupulaga ma Tina, ia atoa le 300 o tagata su’isu’i samoa e ao ina tau’avea le mana’omia o tatou tagata i se isi la’asaga fou o taumafaiga e taofiofi mai le tamaoaiga masa’a atu i fafo.

I le taimi nei ua atoa le 280 o i latou ua mae’a fa’au’u mai a’oga su’isu’i nei, fa’atasi ai ma isi polokalama su’isu’i o lo’o fesoasoani i lea mau. Ua fa’ailoa e Le’iataua Lesa, “Ua toe tasi nei le vasega, ona ausia loa lea o le tatou sini lea, ma o le a toe va’ai toto’a i le mau pe ua tatau ona si’itia le auaunaga e fa’aauau ai, ae o le a fetaui lelei le futia ma le umele i le fa’ai’uga o le nofoa’iga a Kovana Tulafono, ua mautu le 300 o tagata su’isu’i e pei ona mo’omia.”

Mai le amataga o le vasega lenei e to’a 32 i latou na auai, peita’i, o nisi ua maua galuega tumau e faigaluega ai, o nisi o lo’o i ai fa’alavelave le ma’alofia o lo ua fa’atasi atu i ai i le aso patino mo le fa’au’uga lenei.

Ina ua saunoa le ta’ita’i o le Matagaluega, Lei’ataua Lesa Leuga, sa ia fa’apea ai, “E sili ona vave le pu’e a le vasega lenei, ae ou fa’alogo fo’i, e sili ona faigata ona a’oa’oina e le tama’ita’i faia’oga su’isu’i. Fa’afetai onosa’i i le faia’oga, ae fa’afetai tumau i le vasega fa’au’u ma le ola taumafai i lenei taleni! Ia si’isi’i lau fua, ia le fa’apalapala i le taleni, ae ia tumau ai ma fai!”

O le vasega fa’ai’uaso su’isu’i e aofia ai: Atina’e Mataio, Etevise Vaiau, Fa’alilo Filiga, Fiailoa Natapu, Georgina Mahkwan, Katie Te’o Tauava, Leiloa M. Tupua Ah Siu, Louise Azarvand, Mareta Sale, Margrette Lalaga, Mata’ia Ino, Meli Ofagalilo, Moemoe Singh, Moli Maletino Tausaga, Motusaga Peleti, Palefuiono Sai Ilaoa, Raywyn Jane Taufa’asau, Seneuefa Fa’asavalu, Sia Nu’usa, Talau’ula Noue, Toe Fesulua’i, Tofoipupu Taope Fa’amoana ma Vaelua Esekielu.

O se aiga tele sa faia, ma taua’aoina ai fo’i ni meaalofa matagofie o le Ie laulau ua mae’a toloseina e le vasega o le falelalaga, fa’atasi ai ma papa laufala na latou lagaina mo le Kovana ma Fa’atonu e to’alua sa latou vagaia lea la’oa’i matagofie.