TO’A 15 LEOLEO MAUA TUSI PASI I A’OA’OGA FA’APITOA

E to’a 15 ali’i ma tamaitai leoleo mai le Matagaluega o le Puipuiga o le Saogalemu Lotoifale ua latou tauaaoina Tusi Pasi faapitoa, e mafai ai ona latou su’esu’ina mataupu e faatatau i tagata ave ta’avale ‘onana i luga o le alatele.

 

O le taeao ananafi na tauaaoina ai e le afioga i le Komesina o Leoleo ma nisi o le au taupulega tusi pasi mo i latou nei, i le mae’a ai o se aoaoga sa faagasolo mo le umi e 40 itula, i lalo o le ta’ita’iga a le Taitai o le Ofisa o Leooleo Suesue (CID) ia Cmdr. Lavata’i T. Sagapolutele, ma le Sui Ta’ita’i o le Traffic Division ia Sgt. Utumoe Alefosio, o i laua ia sa faauu mai i se aoga sa faia i le Iunaite Setete, i auala e suesueina ai mataupu e faatatau i tagata ave taavale ‘ona i luga o le alatele.

 

O nisi o faiaoga sa i ai i le faatautaiga o lenei faamoemoe e aofia ai le tofa a Cmdr. Sunia Vaa Sunia; Capt. Muagututia John Cendroski, faapea ai ma le Taitai Leoleo ia Vai Maiava.

 

Na faafetaia e le Komesina o Leoleo ia William E. Haleck alii ma tamaitai leoleo sa faauu mai lenei vasega, ona o le avanoa ua mafai ai ona aloaia le avea o i latou ma leoleo e suesueina mataupu faapenei.

 

“E le o leoleo uma e mafai ona latou suesueina mataupu e faatatau i tagata ave taavale ‘ona i luga o le auala tele, e na o outou lava, o le mafuaaga lena ua faauuina ai outou i lenei taeao (taeao ananafi), ina ua outou ausia vaega uma o lenei aoaoga,” o le saunoaga lea a le alii komesina.

 

I le aga’i atu ai o leoleo e faatino a latou tiute i luga o le alatele, sa fautuaina ai i latou e le alii komesina, ina ia faavae la latou galuega i le alofa ma le faaaloalo, ma ia asoa i o latou ua le faamuamua o le va fealoa’i.

 

“Afai tou te taofia taavale a tagata o le atunuu i luga o le auala, fai ma le faaaloalo la outou galuega, fai pei lava i latou o nisi o lou aiga, o lou tama poo lou tina fo’i, aua o mea lelei tou te faia, e ta’uleleia atu ai a’u ma le matagaluega atoa,” o le fautuaga lea a le alii komesina i leoleo, ma ia talia aloaia ai loa i latou e toa 15 ua pasi i vaega uma o le aoga e pei ona faatautaia mo le lua vaiaso.

 

O i latou ua faamanuiaina i tusi pasi e filifili mai i vaega taitasi o le Matagaluega o Leoleo, e aofia ai lala o fale leoleo i Sisifo, Sasa’e atoa ai ma le ofisa tutotonu o Fagatogo.

 

Saunoa le Sui Komesina ia Leseiau Laumoli e faapea, e ui sa i ai foi isi aoaoga faapenei sa faia i tausaga ua mavae, peitai e ese mamao ma aoaoga lea ua maea ona a’o tauina ai i latou nei.

 

O aoaoga fo’i nei o lo o faia i ofisa o leoleo i setete uma ma teritori o le Iunaite Setete, lona uiga, o lo o laina tutusa Amerika Samoa ma isi vaega faamalosi tulafono i le faamalosia o tulafono e uiga i le ave taavale ‘ona.

 

Na fautua Leseiau i leoleo e faapea, e leai se aoga o aoaoga ua latou maua pe afai e sese ona faatino a latou tiute.

 

Ua fautuaina foi le mamalu o le atunuu, ina ia faaeteete i le tagofia o le ava ma ave le taavale, leaga e aafia atu ai ma le saogalemu o tagata lautele.

Comment Here