Ads by Google Ads by Google

To’a 12 faipule na lagolagoina pili tupe a le Kovana

E to’a 12 faipule na palota ioe i le pili tupe lea na faaulu e le kovana, e faasoasoa atu ai le 10 miliona e faatupe ai le polokalama e ave ai gasegase i fafo mo togafitiga, lea ua suia e faipule i le 2.3 milionaj, ae to’atolu na palota leai, ina ua pasia e le maota o sui lana pili tupe.

A’o le’i faitauina le pili i lona faitauga faatolu i le taeao ananafi, na tulai le taitaifono o le komiti o le Soifua Maloloina/LBJ a le maota o sui ia Puleleiite, ma faalauiloa nisi o suiga laiti e manaomia le toe tuuina i totonu o le pili, ina ia o gatasi ai ma suiga ua maea ona pasia e le maota o sui i le tino atoa o le tulafono.

O suiga ua faia e le maota o sui, e aofia ai le aveese lea o le lafoga e 2% i totogi lea sa fuafua le malo e toe faaopoopo i totogi o tagata faigaluega uma lava i le atunuu, faatasi ai ma suiga tetele ua fai ai i le siitaga o laisene mo pisinisi, atoa ai ma lafoga faaletausaga lea o le a totogi e pisinisi taitasi.

Sa manatu le malo ina ia totogi e pisinisi uma lava e silia ma le 500 i le teritori le lafoga e tai $2,000 i le tausaga, peitai fai mai le maota o sui, e fuafua le lafoga e totogi e le pisinisi i lana tupe maua i le tausaga.

O pisinisi uma lava e i lalo o le $250,000 lana tupe maua i le tausaga na te totogiina le lafoga e $200.

O pisinisi uma lava e i lalo o le $500,000 lana tupe maua i le tausaga na te totogiina le lafoga e $500.

O pisinisi uma lava e i lalo o le $750,000 lana tupe maua i le tausaga na te totogiina le lafoga e $750.

O pisinisi uma lava e i lalo o le $1 miliona lana tupe maua i le tausaga na te totogiina le lafoga e $1,000, ma le pisinisi e sili atu i le $1 miliona lana tupe maua i le tausaga, na te totogiina le lafoga e $2,000 i le tausaga.

O le laisene mo falepia lea o loo $50 i le taimi nei, sa manatu le malo e faaopoopo i ai le $300, peitai ua teena ma suia e le maota o sui, ae faaopoopo i ai na o le isi $50, ae mo le laisene mo pisinisi o loo faatauina atu le ‘ava malosi lea o loo $75 i le taimi nei, sa mana’o le malo e faaopoopo i ai le $460, peitai ua teena e faipule ae faaopoopo i ai le $25 i le tau o loo i ai.

O isi ituaiga pisinisi uma lava i le atunuu sa manatu le malo e faaopoopo i ai le silia i le ta’i 100% mai le totogi o a latou laisene o loo i ai, ua suia e le maota o sui ae faaopoopo i ai na o le tai $50 mai le tau tuai o loo i ai, sei vagana ai laisene mo pisinisi o loo aumaia le ‘ava malosi, atoa ai ma pisinisi o loo latou faatauina atu le ‘ava malosi i le atunuu, ua faaopoopo i ai e faipule le $100 i le totogi o a latou laisene o loo i ai i le taimi nei, lea o loo $1,000 peitai ua suia i le $1,100.

E le’i auai le afioga i le alii faipule ia Larry Sanitoa i le tauaofiaga i le taeao ananafi, peita’i i sana tusitusiga na tuuina mai i le Samoa News i le taeao ananafi, o loo taua ai lona tete’e i lenei tulafono.

Na taua e Sanitoa e faapea, e tele naua mafuaaga e ala ai ona ia tete’e i le tulafono lenei, aemaise lava le tulaga lea o le toe faaopoopo ai o le avega i luga o le atunuu, pe afai e sii e le malo lafoga i oloa ma laisene pisinisi, ona faasaga mai lea o pisinisi ua sii le tau o oloa ma i’u ina pagatia ai le atunuu.

“O se tasi o popolega ia te a’u i le tulafono lenei, afai o le a sii lafoga i oloa, o le a faaitiitia oloa e sau i totonu o le atunuu, faaitiitia ai oloa e maua mai ai e le malo lafoga, ma faaitiitia ai tupe maua mo le malo,” o le saunoaga lea a Sanitoa.

“E ui e na o le ava malosi ma le sikaleti lea o le a faaopoopo i ai e le malo le lafoga, ae o le mea moni lava, e i’u ina sii faasolo atoa ai e isi pisinisi tau o ana oloa uma lava ina ia tau faafetaui ai siitaga maualuluga ua faia e le malo,” o le isi lea saunoaga a le alii faipule.

“A le o lena fo’i, o le a i’u ina tulai mai ai ma le faiga lea o loo atugalu i ai nisi o pisinisi, o le aumai faagaoi lea i totonu o oloa e nisi o pisinisi, ina ia aua ai ne’i totogi se lafoga o oloa ia i le malo, ma atili ai le matuia o le faafitauli i totonu o le teritori.”