O nisi nei o fanau e le’i leva ona tu’ua Amerika Samoa ona o le tautua ua ofo atu i vaege au i le militeri.

PITOLUA SAMUELU JR O AUMI, LEONE

O le ali’i talavou lenei sa a’oa’oina i le Fa’asao Malisi High School ma fa’au’u mai ai ia Iuni, 2014 ona malaga lea  mo le fa’amoemoe e ulufale i BCT i Fort Sill Indiana, lea na fa’au’u mai ai ia Fepuari 2015, fa’atasi ai ma nisi o le latou au malaga sa ulufale fa’atasi.

O se tala fiafia ua atoa nei le lua vaiaso talu ona aumau i San Antonio, Texas e fa’aauau ai a’oa’oga fa’apitoa mo le MOS o tau’avea i le US Army. Peita’i e tusa ai ma le fa’amatalaga ua fa’ao’o mai e Pitolua Jr. Samuelu (po’o PJ), “Ua ou tausailia lo’u lumana’i i le US Army, e taumafai ai lava a’u ia e totogi a’u a’oa’oga i kolisi mo se fa’ailoga maualuga.”

I lana tala mai, “Ou te fa’afetai tele i o’u matua, aua o lo’u olaga a’oa’oina, sa amata mai lava o a’oga i A’oga a le Ekalesia Katoliko, mai St. Theresa i Leone, soso’o mai ai i le a’oga maualuga a Malisi Fa’asao, ae o le taimi loa o a’oa’oga i kolisi, ua tatau ona ou tu i o’u lava se’evae ma tausaili mo a’u, ua matutua fo’i nai o’u matua, ua tigaina fo’i i totogi o a’u a’oga!”

Na toe soso’o mai lana tala, “O se tasi lea o auala, ua ou fuafuaina, e toe fa’afo’i ai le agalelei ma le alolofa o o’u matua ia te a’u, o sa’u galuega e mafai ai ona ou toe aoga mo i la’ua ae maise le matou aiga.”

O ia, o le ui’i lea o le fanau e to’atolu a Theresa ‘Tulili’ Ekeroma Aiono - Samuelu ma Pitolua Samuelu Sr. O lona uso matua o ‘Bonch’ ua maliu, e matua, soso’o le la’ua tuafafine e to’atasi Neta.

Ina ua fesiligia le ui’i e tusa ai o le toe toalua i la’ua ma si ona tuafafine, sa ia fa’ailoa mai ma le fiafia, “O lea ua tu’u mai ia te a’u le tofi, taule’ale’a o le aiga, e tatau ona lava saunia i le malosi ma le mafaufau fa’apea ma le tamaoaiga e tau’ave ai le tiute fita lea i totonu o le li’o o le aiga, pe afai e mo’omia e le Tama le tausoa o se mea, ae seki lava tama o le vaega ‘au!”

E na’o le 10 vaiaso o le AIT o lo’o alofaiva atu i ai PJ, ona toe fa’au’u lea ma aga’i atu ai i lona pou e tuite ai, ae o lo’o molita’i mai ona alofa’aga i lona aiga atoa, fa’atasi ai ma lana autalavou i le Koluse Pa’ia Youth Leone, ma fa’amanuiaga e tele ina ia manuia le alofaiva atu o le latou aumaga i le aloina o le fautasi fou o le afio’aga i le Sisigafu’a 2015. Sili ona alofaga i nai ona matua, Theresa & Pitolua Samuelu o Leone.

TAUSALA KIMBERLY MORRIS MAI AUA & FUTIGA

“Ua matua mata’ina lo’u fa’au’uga i la’u BCT ona o le tele o ‘au ula ma rosa, o se mea e le o faia e nisi o lo’o fa’au’u mai i matou, ae ua ou malamalama lelei, o se aga lea e faia pea e lo’u tina pele ua ou misia pea, Auimatagi Salamsina Dorothy Morris o le Tausala Orchids & Flowers i Amerika Samoa.” O se tala lea sa ia talafiafia mai ai i feso’ota’iga tau initeneti i lona ata o le fa’au’uga mai South Carolina sa fa’atasi atu i ai lona uso matua, Suzie Nu’uvali o le US Army, ma o ia lea sa ia fa’ao’oina ane ia te ia nei ula ma ana fugala’au matagofie.

Ona o Suzie Nu’uvali o se tasi ua maualuga tulaga i le US Army, sa le popole ai Tausala i se mea e tasi, ae ua atoa ai fo’i le to’atolu o alo e fa’asino ia Morris i totonu o le US Army, ua iai fa’atasi ma le la’ua tuagane matua, James Nu’uvali.

O Tausala Kimberly Morris o le alo pito i la’ititi lea o le fanau e to’a lima, 4 teine ma le to’atasi lava le tama, a Auimatagi Dorothy ma Kim Morris o Hawaii, Aua ma Futiga. O le 2014 sa tu’ua ai le mafutaga mafana ma le fanau e Auimatagi Dorothy peita’i o le susuga ia Kim Morris na maliu ia Fepuari 2005.

“O se mana’oga tupito i si matou tina, sa mana’o ai e tautua Tausala i le Vaega Au, lea ua fa’ato’a faia e Kimberly ina ua maliu o ia, fa’afetai ua mafaia e le uso lea mana’oga o Mom,” o se tala fiafia lea ma loimata o si uso o Sharon, lea e fa’atautaia le Tausala Orchids & Flowers i Aua.

O lo ua auai atu Tausala i lana AIT mo le taimi nei, ona fa’ato’a fa’atulaga fo’i lea o lana pou tiute, ae ua fa’ailoa mai e ia, “O se fa’amalosi’au tele ona o se mea sa mana’o i ai si o’u tina!”