E to'a 11 alo o Amerika Samoa sa a'otauina i tomai fa'amiliteri i Fort Jackson i Columbus, South Carolina ua fa'amanuiaina nei a latou taumafaiga, ma o se tala fiafia, ua pasia uma lava i latou na o atu fa'atasi mo lea fa'amoemoe. O le aso ananafi sa faia ai le faauuga. O i latou nei:

• SPC Tuinei, Matthew atali'i o Fa’afetai ma MaiavaTuinei o Fagasa ma Faga’itua;

• PFC Magele, Glory o le afafine o Avea ma La’ala’ai Magele o Pago Pago;

• PFC McFall, Malaea o le alo o Keith ma Meanoa Mageo-McFall o Pago Pago;

• PFC White, Snow o le afafine o Charlie  ma Silia White o Vaitogi;

• PV2 Tavila, Hillary o le alo o Elena ma Fa’aliga Tavila o Faleniu;

• PV2 Tupua, Sonny o le atali'i o Lotu ma Ali’itasi Tupua o Pago Pago;

• PVT Faumuina, Prince o le alo e fa'asino i le tofa Taufete’e John ma Akenese Faumuina o Nu’uuli, Leloaloa ma Pava’iai;

• PVT Huakau, Tulei o le afafine o Nika ma Orlando Eugenio o Nu’uuli ma Tafuna;

• PVT Hunkin-Vasa, Olivia o le afafine o Iva ma Maiava Hunkin mai le afio'aga o Futiga ma Tafuna;

• PVT Langkilde, Zachary o le alo e fa'asino ia Lolua ma Joe Langkilde o Pava'ia'i; ma

• PVT McCudding-Steffany, Iliganoa o se alo e fa'asino ia Dion ma Penina Steffany o Fagasa ma Vaitogi.

O le aso ananafi sa fa'atasia ai i latou nei ma latou matua uma na mafai ona asiasi atu ia i latou ina ia fa'atasi ma latou fitafita fa'au'uina, a'o le'i tu'uva'a ese i latou i nofoaga e toe fa'aauau ai le latou tautua i le Militeri. Ia manuia lo outou soifua tautua i vaega au, Toa o Samoa.

Mai nisi o tama'ita'i Samoa o lo'o alaala tumau i lea foi nofoaga a le US Army, ua fa'ailoa mai e Lesili Lee ma Pele Hunkin, "O aso Sa ta'itasi e faia ai sauniga lotu, e sili ona fa'afiafiaina i matou ua foliga mai e pei o matou fa'atasi pea ma aiga i Samoa,  ona o matou pesega fa'asamoa e fia fa'afofoga tele i ai tagata eseese e o mai i sauniga si'itia i le Atua i le Solomon Temple. Afai e tu'ufa'atasia i matou ma le ta pese i le amataga ona faia lea o matou pesega a'o le'i faia le sauniga, ae afai e amata le sauniga ae le'i faia lea pesepesega, ona matou fa'atasi lea pe a maea le sauniga ma faia lea sao mo le Atua, ia fa'atasi ai i matou uma i le vaiaso atoa. O le matou misia fo'i lenei vaega o le fanau, o Toa Samoa i lenei a'ai e a'otauina ai i latou i faiva fa'amiliteri."