Ads by Google Ads by Google

‘Motusia le Ulafala’ ma le Tofa o le Saufaiga - Lauti Simona Vaiola Uelese

“O le mea sili, ua ia te’i tatou le Ali’i!” O se mau e soifua ai so’o se Failauga Fa’amaoni i le Ekalesia Metotisi, ma sa ola ai le tofa le Saufaiga a’o tautua o ia i lana Ekalesia, ae maise fo’i lana tautua i lona afio’aga o Vatia ma lona aiga potopoto ma le Malo.

 

I molimau sa fa’ailo i le ulua’i sauniga o Lauti Simona Uelese, sa latou molimauina le olaga agamalu ma le loto maulalo o lea fo’i auauna.

 

“I ona tiute fa’atino i so’o se mea ua fa’asino na te faia pe ta’ita’ia, e le taitai ona fa’alogoina ua si’isi’i sona leo i so’o se tasi e o’o lava i le fanau talavou.” I si ona tuafafine ui’i ai i le latou aiga, Maria Ah Ching, sa ia molimau i lona tuagane i lona soifua fa’afiafia tagata, a’o le lima mafola i le Ekalesia, auauna a le Atua, ma so’o se tagata e mo’omia se mea ia te ia, ae fa’ato’a soso’o ai lea ma i latou uso ma tuafafine.

 

O Lauti Simona o le lona fitu lea o le fanau a Lauti Uelese o Vatia ma Tolotea Patatu Lauti o Masefau. O ia lea na soifua ane lava i eleele o Vatia, ma e to’a 11 le aofaiga o le fanau a o latou matua. O le masina o Tesema 24, 1968 na fa’aipoipo atu ai o ia i le tina o le aiga Mabel Ta’amu mai Fagatogo. E to’a lima o la’ua alo e to’atasi lava le tama’ita’i ae to’afa ona tuagane.

 

“O le tautua a Lauti Simona i lana Ekalesia e matua le masu’esu’eina, aua e tautala lava galuega a’o le upu ma tala.” O se molimau ola lea a le Ekalesia Metotisi i Vatia lava. O ia o le Failauga Fa’amaoni, ma sa avea ma tofi usufono a le latou Ekalesia i nisi o tausaga ua tuana’i. Sa avea o ia ma teutupe ma toe failautusi i le tausaga lava e tasi i le latou Ekalesia, a’o taumafai ona ausia le malumalu fou o tula’i nei, le maota o le galuega, fa’apea ma le Hall mo le Ekalesia, i luga fo’i o le fanua sa ia foa’ia atoa mo le lotu ina ia lava le fanau e fa’atutu ai nei mea tetele e tolu e aofia ai fo’i ma le malae ta’alo sima.

 

O ia o se sui o le Komiti tumau a le Ekalesia Metotisi i Vatia. Pe afai ae tu’u ane i le Malo, o ia lea sa ta’ita’ifono i le Komiti Fa’afoe o le Fa’asaoina o le Eleele ma le Suavai mai le tausaga 2005-2013. E maliu o ia o lo’o avea ma Fa’aliliu Upu i le Fono faitulafono a le tatou malo. Na ia tau’avea le tofiga Fa’atonu o le 10th Pacific mai le tausaga 2004-2008. Na avea fo’i o ia ma Fa’atonu o le Matagaluega a le Admin Services a le Malo mai le tausaga 2000-2004.

 

Mai le 1993- 2000 na avea ai ma so’oupu mo le Ofisa o Mataupu Tau Samoa. Peita’i i le taimi na alaala ai ma a’oga ma faigaluega i fafo, sa tautua ai o se Pule i le Ofisa o Fa’amasinoga Fa’aleitumalo a le Feterale mai le tausaga1969 se’ia o’o i le 1992. O lana ulua’i galuega lava i le tatou malo ina ua mae’a ana a’oga o le Ofisa o mataupu Tau Samoa mai le 1966-1969, ona masi’i ai lea i fafo.

 

I lona soifua a’oa’oina, sa amatalia lava i le Felela i Atu’u, soso’o ai ma le si’itia atu i le Samoana High a’o fa’aigoaina o le American Samoa High School i Utulei lava, ma fa’ai’u ai loa ana a’oa’oga i le Central Connecticut State College.

 

Ina ua finau atu e toe taliu i fafo mo ia ona o lona gagau ua i ai, ae fa’ailoa mai e le tausi, “Ia te a’u, ou te le toe fa’alavelave i le ola fiafia ma sa’oloto o lo ua i ai Lauti, o lana ata i taimi uma, ua iloga ai lona soifua fiafia e tautua ua i ai, ae ou te le toe mana’o e toe suia lona lau fofoga fiafia e pei ona matauina e le to’atele.”

 

Ua mae’a ona tau e Lauti Simona le taua lelei, ua i’u ia te ia le tausinioga, ua ia taofi lava le fa’atuatua. Ia manuia lau malaga, ma ua e malolo.