O le tausaga lenei e atoa i ai le 50 tausaga, po’o le Iupeli Auro o le Kamupani I’a a le Starkist Samoa Inc. i lona afua mai i le 1963. O lo ua fa’atulaga, o le aso 17 Aukuso 2013, o le a faia ai se sauniga fa’apitoa e auai mai ai se ‘au malaga mai le Kamupani o Fa’afoea le tatou nei Kamupani I’a mai Portland, Oregon ma South Korea, e fa’amamalu atili lea fa’amoemoe ua leva ona tulimata’ia mai e tatou tagata ma lo tatou malo, aua o i tatou lea e galuea’ina lea kamupani i’a i lana tautua i aso ta’itasi mo le 50 ai lenei o tausaga.

Ua fa’ailoa mai, atonu o le fonotaga fa’apitoa a le Taupulega lea o le a faia i le aso, o le a fa’amautu ai loa le polokalama fa’ataoto o lea aso tele mo le “Iupeli Auro o Charlie le Tuna.”

O se tala mai le susuga le Pule Sili o le Star Kist Plant i Satala, Brett Buttler, sa ia fa’ailoa mai ai, “Ua loa ona amatalia mai nai tapenaga a le aufaigaluega ma le pulega talu mai le masina ua te’a, ma ua fa’atautaia lava nai ta’aloga i totonu lava o vaega ta’itasi o le Kamupani, e sailia ai ‘au e su’ea le siamupini mo le vaitaimi tonu lava o le fa’amanatuga o le Iupeli Auro ia Aukuso o lenei tausaga.”

Afai o lau aufaipese ua lautogia e maua fa’ailoga, ua fa’amoemoe fo’i e tufaina fa’ailoga na  i le polokalama fa’apitoa o le Iupeli Auro. E le gata i lea, ae ua i ai nai tauvaga laiti ua fa’atautaia lava i aso ta’itasi mai totonu o le Fale’ai, ua lisia ai le fesili i lea aso ma lea aso, e fesiligia ai tagata faigaluega i nai fesili patino i le Kamupani a le Star Kist ma lona tala’aga, afai e sa’o le tali a le tagata faigaluega, o ia lena e maua fua le pusa ‘apa wahoo.

O nei mea na ua amata fa’ailoga ai lava le tausaga lenei e atoa i ai le 50 tausaga o le Star Kist, e fa’afiafia loto fo’i i nai tagata faigaluega ua tautuaina le Star Kist i lenei vaitau. O le Liki o ta’aloga Volipolo ua mae’a fa’atautaia, ma ua sailia lava ‘au e ono sa’ilia siamupini i tama’ita’i ma ali’i, o ‘au sili ona malolosi, e sailia le siamupini i se vaitau tulata i le fa’ailogaina o le Iupeli Auro po’o lea fo’i lava aso.

O le masina fo’i o Aperila, ua saunia ai le Kamupani i ana tagata faigaluega uma, e savavali i le savaliga fa’aaloalo o le Sisigafu’a o lenei Tausaga 2013. “O se tasi lea fa’aaliga tele o se sao o le Star Kist Samoa i le tatou malo, ona o le anoanoa’i o tagata faigaluega o lo’o sailia ai le tamaoaiga e tausia ai latou fatuaiga mai lea Kamupani.” O se tala lea a le susuga Pa’u i le tusitala o le Samoa News.

O se isi lava fa’aea a le Star Kist mo se tasi sa loa fo’i lana tautua i le Kamupani I’a a’o galue ai i tulaga tau ta’ita’i ma sa fa’auluulu i ai le vaega a le Personnel, le tofa Taeaoafua Meki Solomona, e ui lava ina ua tu’ua le galuega ma le tofi sa i ai i le Star Kist, ae o lo’o aofia pea o ia i le fuafuaga o le fa’apolokalamaina o le latou 50 tausaga.

“E le o tu’ua atu lava e le Star kist Solomona se’ia vagana ua mae’a le matou 50 tausaga ua loa ona afuafua fa’atasi mai e i matou, aua sa leai se fa’amoemoe o le Kamupani e tu’ua e ia i matou mo se isi galuega i le malo! Peita’i, e taua lava o ia i le matou polokalama fa’ataoto.” O se tala ata lea a le susuga le ali’i pulesili o le Star Kist Samoa Buttler.